Denuncian que unha empresa recolle coches no aeroporto de Santiago e os deixa nas beiravías sen vixilancia

De camiño ao aeroporto da Lavacolla, a imaxe é a de arredor de 250 coches estacionados en estradas secundarias, en beiravías e incluso en terreos de AENA lindeiras ás instalacións aeroportuarias.

Veciños afectados e empresas de aparcadoiros de baixo custo responsabilizan desta situación a unha empresa que aseguran exerce sen licenza desde hai varios anos. Din que son moitos os usuarios que foron multados por estaren mal estacionados.

Tanto os propietarios doutras empresas como veciños da Lavacolla aseguran que foron increpados, ameazados e denunciados falsamente.

Aseguran que tanto o Concello coma as forzas de seguridade están ao corrente e que os feitos xa están no xulgado desde hai anos. A Galega púxose en contacto coas persoas que presuntamente ofrecen este servizo de aparcadoiro sen licenza e declinaron facer declaracións ao respecto.