Descalzarse nos controis dos aeroportos dos EUA deixa de ser obrigatorio
A medida pon así fin a unha norma que foi obrigatoria durante case 20 anos nos aeroportos estadounidenses
A tecnoloxía cambiou de forma drástica, o cal permite modificar esa esixencia en todos os aeroportos do país
REUTERS / Andrew Burton / File Photo
Os viaxeiros xa non teñen que quitar os zapatos para pasar os controis de seguridade nos aeroportos dos EUA, confirmou este martes a portavoz da Casa Branca Karoline Leavitt.
"Gran noticia do Departamento de Seguridade Nacional!", escribiu Leavitt na rede social X compartindo unha mensaxe dunha correspondente da cadea CBS News na que asegura: "Os viaxeiros xa non teñen que quitar os zapatos para pasar a fila regular nos controis de seguridade da TSA (siglas da Administración de Seguridade no Transporte) nos aeroportos".
A medida pon así fin a unha norma que foi obrigatoria durante case 20 anos nos aeroportos estadounidenses.
Segundo precisou nunha conferencia de prensa a secretaria de Seguridade Nacional Kristi Noem, o Executivo quere mellorar a experiencia das viaxes conservando os estándares de seguridade e asegurándose ao mesmo tempo de manter a xente segura nos seus desprazamentos aéreos.
Tal e como dixo nunha conferencia de prensa desde o aeroporto Ronald Reagan de Washington, a medida permitirá axilizar os fluxos de pasaxeiros nun momento en que moitos visitantes están a chegar ao país, e anticípase que aínda máis xente viaxe a Estados Unidos cando se conmemore en 2026 o 250 aniversario da nación e se celebre ese mesmo ano o Mundial de fútbol ou en 2028 os Xogos Olímpicos.
En agosto de 2006 a TSA comezou a esixir a retirada do calzado nos controis de seguridade previos ao embarque nun avión comercial.
Desde 2002, o requisito era optativo por mor de que pouco antes un pasaxeiro británico fose descuberto a bordo dun voo entre París e Miami tratando de detonar un explosivo no seu calzado.
Distintos informes de intelixencia que falaban de plans de grupos terroristas para usar métodos deste tipo para atentar en voos comerciais levaron a facer a norma obrigatoria case cinco anos despois.
Pero nestas dúas décadas, segundo dixo este martes Noem, a tecnoloxía cambiou de forma drástica, o cal permite modificar esa esixencia en todos os aeroportos do país.
A secretaria avisou que a algún pasaxeiro se lle solicitará quitar os zapatos se se considera necesario efectuar algún recoñecemento adicional. "Pero en termos xerais, a política será que xa non se requirirá que cada persoa o faga ao chegar a un control".
"A época dourada dos Estados Unidos xa está aquí. Entusiásmanos poder facer que a experiencia de quen viaxa a través dos nosos aeroportos sexa moito máis hospitalaria e eficiente", apuntou.
