Israel identifica como Eliyahu Margalit o cadáver do refén entregado por Hamas
O corpo fora exhumado este venres en Gaza
O Centro de Medicina Forense Abu Kabir de Yafa identificou durante a noite o cadáver do refén entregado por Hamas como pertencente a Eliyahu Margalit, anunciou a oficina do primeiro ministro, Benjamín Netanyahu.
"Representantes do Exército informaron á familia do secuestrado Eliyahu Margalit de que o seu ser querido fora devolto a Israel e a súa identificación completada", recolle o comunicado.
O grupo islamita Hamas anunciara ete venres que entregara á Cruz Vermella o cadáver doutro refén en Gaza, exhumado ese mesmo día.
“Como parte do acordo Tormenta de Al Aqsa para a liberación de presos, as Brigadas Al Qasam, o brazo armado de Hamas, entregarán o corpo dun prisioneiro israelí exhumado hoxe en Gaza ás 23.00 horas locais (20.00 GMT)”, sinalaron nun comunicado.
Pola súa banda o exército israelí asegurara que a Cruz Vermella recibira o corpo do refén e que o trasladara para poñelo baixo custodia das súas tropas na Franxa de Gaza.
Tras a saída do corpo de Margalit de Gaza quedan no enclave 18 corpos de reféns.
