Denuncian o estado de abandono en que se atopa o barrio coruñés do Martinete
Din que levan anos con investimento cero na zona
Non teñen en mente medidas de presión, pero si queren que os escoiten
Veciños do barrio coruñés do Martinete alzan a voz contra o que consideran o abandono da zona por parte do Concello. Quéixanse de que os seus impostos non se traducen en ter tan sequera uns accesos dignos.
Din tamén que nin pequenos nin maiores poden ir seguros pola rúa. Quéixanse da escaseza de iluminación e da falta de beirarrúas por algunhas zonas do barrio.
Reclaman amais lugares de lecer e espazos verdes, porque nin teñen parque infantil.
Todos coinciden en que xa son moitos anos de investimento cero na zona onde conviven os veciños de cinco mil vivendas dos barrios do Martinete e do Birloque. Din que, polo momento, non teñen en mente emprender medidas de presión, pero si queren que os escoiten.
