Os bares de praia abren a partir deste venres e poderán traballar seguido ata o 31 de outubro
Comeza a primeira temporada de praias en que a Xunta ten a xestión do litoral
Esta campaña bate un récord no número de solicitudes para abrir negocios de praia
A partir deste venres xa poden funcionar nas praias os negocios de servizos. Será a primeira vez que o fagan dende que a Xunta asumiu as competencias en xestión do litoral.
Volver gozar dun refrixerio con vistas ao mar en calquera dos bares de praia de toda Galicia será posible a partir de mañá, cando arranca a temporada.
Son máis de 300 en toda a comunidade, que este ano, como novidade, poderán abrir dende mañá o 31 de outubro sen interrupcións.
Salvador Otero é o propietario dun destes establecementos a pé de praia. Para que todo estea listo e en condicións, Salva e o seu equipo traballan a todo ritmo para recibir a todos.
"Antes só abriamos dende o 1 de maio, que era cando nos deixaban abrir. Xa en Semana Santa non abriamos porque era un encordio. Buscar empregados para catro días, dalos de alta, dalos de baixa, o mesmo coa luz. Agora xa facemos coma en outras comunidades que abrían e xa traballaban seguido".
Neste primeiro ano de xestión autonómica da costa bateuse un récord de solicitudes para locais de hostalería. A normativa abarca tamén outro tipo de negocios, como o alugueiro de hamacas, canoas ou casetas de salvamento.
