Declaran nulo un despedimento por WhatsApp dun traballador de baixa cando se atopaba en urxencias

O Xulgado do Social nº2 de Santiago de Compostela declara nulo o despedimento dun traballador de baixa dunha axencia de publicidade que comunicou por WhatsApp cando o empregado se atopaba en urxencias por un cadro de ansiedade. O ditame foi ratificado polo Tribunal Superior de Xustiza de Galicia (TSXG).

Deste xeito, a sentenza obriga a empresa con sede en Santiago a readmitir o traballador e a aboar unha indemnización duns 7.500 euros por vulneración de dereitos fundamentais. Segundo os feitos probados da sentenza, a compañía envioulle por mensaxe telefónica, a través da aplicación WhatsApp en setembro de 2023, foto do escrito no que daba por finalizada a relación laboral por non superar o período de proba. Foi no mesmo día en que o empregado iniciaba unha incapacidade temporal por un trastorno de ansiedade xeneralizado e minutos despois de que o traballador avisara o seu xefe que se atopaba en urxencias.

A xuíza considera que a empresa non achegou durante o xuízo unha xustificación obxectiva e razoable para o cesamento nin das "supostas queixas de clientes". Ademais, sinala que non correspondía período de proba algún porque o traballador fora contratado anteriormente pola devandita empresa para desempeñar as mesmas funcións.

Pola súa banda, o Tribunal Superior de Xustiza de Galicia desestimou o recurso de queixa interposto pola empresa de publicidade, polo que a resolución é firme e non cabe recurso.