Dá positivo por alcol o condutor detido en Vigo tras unha persecución e golpear dous coches patrulla

Axentes da Policía Local de Vigo detiveron a un condutor de 27 anos de idade como presunto autor dun delito contra a seguridade viaria, que golpeou dous coches patrulla tras unha perigosa persecución, que, ademais, deu resultado positivo no test de alcoholemia e levaba encima un envoltorio con cocaína.

Os feitos ocorreron na madrugada deste xoves, cando unha dotación policial que circulaba pola avenida do Aeroporto observou que un turismo circulaba a unha velocidade elevada e que o condutor, ao decatarse da presenza dos axentes, fixo un cambio brusco de dirección. Os policías iniciaron o seguimento dese condutor, que cada vez circulaba máis rápido para eludilos, realizando derrapaxes e manobras bruscas, e chegando a alcanzar os 120 quilómetros por hora en vías limitadas a 30 quilómetros por hora.

A patrulla avisou a outras dotacións para interceptar ao sospeitoso, e un dos vehículos policiais saíulle ao paso aínda que o condutor golpeou o coche policial. Pouco despois, o primeiro vehículo patrulla chegou á zona, e o condutor golpeouno tamén, aínda que quedou bloqueado polas dúas dotacións. Os policías tentaron que o sospeitoso baixase do coche, pero este ofreceu resistencia, golpeándoos e suxeitándose fortemente ao volante.

Finalmente, unha vez fóra do vehículo, puido ser identificado e sometido á proba de alcoholemia, que deu resultado positivo de 0,57 e 0,58 mg/l. Ao inspeccionar o coche, os axentes atoparon un envoltorio cunha substancia, posiblemente cocaína, polo que, ademais da denuncia penal por un delito contra a seguridade viaria, foi denunciado tamén pola vía administrativa.