Cortan ao tráfico unha rúa de Nigrán por mor dunha fochanca
Os operarios municipais xa traballan no lugar para reabrir a rúa á circulación cando sexa segura
Non é a primeira vez que se produce un afundimento na rúa Reverendo José María Pérez de Nigrán, pero a última fochanca que se abriu alí foi moito máis grande e converteuse nun risco evidente para condutores e peóns.
A acumulación de auga por mor dos temporais parece estar detrás do afundimento do asfalto e ademais dáse a circunstancia de que a vía está construída sobre un regato.
Os operarios xa traballan para reforzar a súa canalización e repoñer o asfalto aínda que as tarefas non son doadas.
Mentres duren as obras a rúa permanerá pechada ao tráfico e os veciños deben usar outras alternativas. A intención do Concello é reabrila en canto sexa seguro circular por ela.
