A folga de médicos aprazou xa máis de 1.600 operacións e 32.000 consultas en Galicia

 A folga convocada o pasado martes pola Confederación Estatal de Sindicatos Médicos (CESM) en Galicia aprazou xa un total de 1.670 intervencións cirúrxicas, 32.696 consultas externas e 2.691 probas. Así o informou o Sergas na tarde deste mércores na novena xornada da folga.

Nesta novena xornada de folga, os representantes sindicais e representantes do Sergas reuníronse na procura dunha solución ao conflito.

Os representantes dos traballadores anunciaron que non prevén suspender o paro ata que se vexan cumpridas as súas peticións.

A Confederación Estatal de Sindicatos Médicos chegaba ao encontro con boa disposición 

"Nós o que dicimos é que estamos dispostos a negociar, que non queremos liñas vermellas, pero temos que avanzar dunha maneira ostensible porque nos desprezaron durante todo este tempo pensando que a folga ía ser un fracaso", di Enrique Marra López, secretario xeral de CESM Galicia.

As reclamacións téñenas claras, son as mesmas que levan proclamando nas concentracións diarias desde que empezou a folga.

"A xornada de 35 horas semanais, o aumento do prezo da hora da garda, a atención primaria coas axendas topadas tanto para médicos de familia como para pediatras, o pagamento do complemento específico no que reclamamos que a igual traballo o salario ten que ser igual", enunciaba Enrique Marra López, secretario xeral de CESM Galicia.

As reclamacións recibiron este mércores o apoio do Consello de Colexios Médicos.
A Xunta sostén que o 75 % das demandas xa están en marcha ou acordadas na mesa sectorial, onde non está representando o sindicato que convoca. No sindicato din que non lles vale e manteñen que os compromisos teñen que ser efectivos.