A Xunta aproba un plan para reforzar as infraestruturas hidráulicas e garantir a subministración da auga

Na primeira reunión do Goberno galego logo do parón vacacional, o consello da Xunta deu luz verde á elaboración dun plan para reforzar a eficiencia das instalacións hidráulicas de Galicia e garantir a subministración de auga.

O presidente da Xunta, Alfonso Rueda, subliñou que, entre outras medidas, contempla a posible creación de novos encoros, un maior aproveitamento de augas subterráneas ou incrementar o uso de sistemas de reutilización da auga.

Na actualidade a Xunta destina máis de 61M€ a medidas para mellorar o aproveitamento de auga dispoñible e o correcto funcionamento das instalacións hidráulicas, avaliar a demanda de auga e a nova realidade climática e planificar as accións que haberá que levar a cabo.

Entre as medidas emprendidas destacan a colaboración cos concellos para promover novas depuradoras e abastecementos ou reducir as fugas e perdas de auga.

 

Rueda fixo un chamamento o uso responsable da auga "con sentidiño". O presidente galego subliñou que os nove encoros que abastecen de auga á cidadanía teñen as súas reservas máis de 15 puntos por debaixo da media habitual dos últimos cinco anos, cun 62,4%, malia que as chuvias dos últimos días aliviaron en parte o risco de seca.