A Xunta crea o programa Fogar Vivo para buscar que haxa máis vivenda en alugueiro a prezos accesibles

O Consello da Xunta aprobou este luns destinar 5,7 millóns de euros para o novo programa Fogar Vivo para promover que 1.300 vivendas de titularidade privada entren no mercado do alugueiro con rendas accesibles.

Os propietarios, segundo explicou o conselleiro de Presidencia, Diego Calvo, poderán optar a recibir axudas de ata 16.000 euros para destinar a realizar reformas ou cubrir gastos de seguros de impagamento ou de fogar.

As axudas para os propietarios serán de 11.000 euros para rehabilitación e 3.000 euros para o seguro de falta de pagamento, para os propietarios que aluguen as súas vivendas baleiras por un período de 5 anos. Ademais terán un incentivo a maiores de 2.000 euros se os inquilinos son persoas de menos de 36 anos.

Os beneficiarios optarán ás axudas en concorrencia non competitiva -por orde de presentación das solicitudes- e terán que cumprir o requisito de que as vivendas estivesen baleiras polo menos os 3 meses anteriores e que os prezos non excedan de determinadas cantidades, en función da zona en o que estea o municipio.

Así, na zona 1 (A Coruña, Santiago de Compostela, Vigo e Pontevedra) o alugueiro máximo permitido será de 700 euros; de 650 euros en Lugo, Ourense ou Baiona; de 600 euros na Estrada, Cangas ou Narón; de 550 euros en Ares, Noia, Sarria ou Cambados, e 450 euros no resto.

Tamén en materia de vivenda, o Executivo galego autorizou a construción de 118 vivendas de promoción pública en Pontevedra en tres parcelas cedidas polo concello.

Axudas pola veda do xurelo e o polbo

O Consello da Xunta tamén aprobou destinar case 7 millóns de euros a novas axudas para compensar aos armadores e tripulantes afectados pola veda de xurelo e de polbo.

Nesta ocasión os armadores que tamén formen parte da tripulación poderán optar ás dúas axudas, que irán dos 2.200 aos 6.000 euros.

Amais, autorizouse a posta en marcha dunha nova aceleradora de empresas, que vai estar centrada no sector do deporte e o benestar, e que contará un orzamento de inicio de 5,5 millóns para impulsar en tres anos ata 56 proxectos empresariais.

E tamén en materia económica acordouse incrementar nun 50 % o orzamento para as axudas ás empresas que contraten menores de 30 anos, ata alcanzar os 6,3 millóns.