Condenan un profesor a 180 anos de prisión por gravar 42 mulleres en baños e probadores

A Sección Primeira da Audiencia de Navarra condenou un total de 180 anos e 9 meses de prisión ao profesor do IES de Zizur que gravou a 42 mulleres en baños do centro, así como en probadores de establecementos comerciais, segundo informa o Tribunal Superior de Xustiza de Navarra.

Na sentenza, que pode ser recorrida ante o Tribunal Superior de Xustiza de Navarra, os maxistrados indican que, de conformidade co artigo 76 do Código penal, o máximo de cumprimento efectivo polas penas de prisión impostas nesta causa é de 15 anos, o triplo da pena máis alta establecida (5).

Entre as súas vítimas, estaba unha veciña, quen, ao decatarse da cámara, interpuxo en outubro de 2023 a denuncia que deu orixe á posterior investigación policial e xudicial.

O acusado, segundo recolle a sentenza, tamén se aproveitou da súa condición de docente e, usando os datos privados das alumnas do instituto onde traballaba, apoderouse das súas claves de acceso de correos e redes sociais como Instagram ou Snapchat, co que accedía a todo tipo de arquivos e fotos privadas que logo gardaba.

O condenado foi considerado autor de máis de corenta delitos contra a intimidade, continuados contra a intimidade e de posesión e elaboración de pornografía infantil. Amais da pena de prisión deberá indemnizar ás vítimas con entre 3.000 e 15.000 euros.

O docente recoñeceu todos os delitos contra a intimidade, aínda que avogou pola consideración dos mesmos como delito continuado, unha circunstancia que descarta de pleno a Audiencia, “xa que cada persoa prexudicada é independente das demais e goza de plena titularidade dos dereitos fundamentais violentados, neste caso a súa intimidade”.

Por outra banda, a Audiencia resalta que a pericial dos axentes foi “demoledora” e desmontou a tese da defensa. Así sinala que rebateu o acceso masivo ás contas e confirmou o acceso selectivo.

Tamén rexeitou o inmediato borrado dos arquivos, sinalando que "practicamente todos foron conservados e non houbo que recuperalos”.

Ademais, engade a resolución xudicial, tiña os contrasinais, o que lle garantía o acceso directo, total e libre, ás redes sociais das menores. Os investigadores, así mesmo, atoparon indicios da posesión dun programa informático para poder utilizar a intelixencia artificial para conseguir fotografías espidas coas menores.

Respecto ás atenuantes solicitadas pola defensa, a Audiencia rexeita as de trastorno mental, dilacións indebidas e confesión. En cambio, aprecia a de reparación do dano, unha circunstancia que conleva aos maxistrados á imposición das penas no seu límite mínimo.

A Sección Primeira da Audiencia impúxolle, así mesmo, 10 anos de inhabilitación para calquera profesión, oficio ou actividade relacionada con menores de idade.