Compran unha moto e simulan o seu roubo para cobrar do seguro

A Audiencia de Pontevedra condenou a penas de cárcere a tres persoas que estafaron máis de 22.000 euros a unha aseguradora tras simular o roubo dunha motocicleta valorada en 22.500 euros.

O tribunal impuxo dous anos de prisión a dous dos acusados por un delito de estafa procesual. O terceiro, que confesou os feitos, recibiu unha condena reducida a seis meses de cárcere. Ademais, os tres deberán indemnizar de forma conxunta e solidaria á aseguradora con 22.141 euros.

Segundo a sentenza, os procesados "actuaron de mutuo acordo e cun plan previamente concertado" para adquirir a motocicleta nun concesionario, contratarlle un seguro a todo risco que incluía cobertura por roubo e denunciar posteriormente a súa suposta subtracción. A aseguradora, cumprindo o contrato, abonou o importe do vehículo.

O plan quedou ao descuberto tras as desavinzas entre os tres implicados pola repartición do diñeiro, cando un deles presentou unha denuncia na que explicou os detalles da operación fraudulenta.