Comezan os festexos polo Esquecemento en Xinzo de Limia

En Xinzo ultiman os preparativos para unha das súas festas con máis sona, a do Esquecemento. Este domingo as tropas romanas volverán cruzar o río Lethes para loitar contra os castrexos e invadir Gallaecia. Non falta nin o campamento, nin o mercado, nin a ambientación que merece unha festa histórica coma esta, que se prolonga durante toda a fin de semana.

Xinzo de Limia prepara a súa volta o ano 137 antes de Cristo.

"Baseámonos nun feito histórico que moi probablemente sucedera nesta zona, que é a chegada das tropas romanas comandadas polo xeral Décimo Xuño Bruto, e que iniciou a súa conquista da Gallaecia camiño o Finis Terrae por aquí, polo río Lethes. Estamos orgullosos, reivindicámolo, e iso fai que sexa especial, que sexa distinta e que sexa moi nosa tamén", explica Marcos Argibay, presidente da Asociación cultural Civitas Limicorum.

O caso é que os romanos vencen os castrexos e invaden Gallaecia, despois de atravesar o río Lethes, ese que dicían facía perder a memoria a quen o cruzaba. 

"Hai un pouquiño de todo, principalmente din que é historia. Din que non se sabe exactamente se foi aquí xusto neste punto onde Décimo Xuño Bruto cruzou o río. Pero máis que nada está situado no río Limia, por esta zona da Limia. Si, hai esa parte de historia onde é o que din: que Décimo chegou, cruzou e conquistou", apunta Ana Lozano Márquez, da Asociación cultural Civitas Limicorum.

Haberá actividades durante toda a fin de semana. Os festexos comezan coa apertura do campamento romano castrexo, o Macellum, o mercado de artesanías, e o desfile nocturno. Nel participan máis de 500 persoas que acompañan as vestais no acendido do lume sagrado. Ese que din, servirá para alumealos nestes tres días de historia, lembranza e festa.