Comeza a folga de 48 horas convocada por CIG e STEG no ensino medio, FP e réxime especial

Este martes comezan as 48 horas de folga convocadas polos sindicatos CIG e STEG en todo o ensino medio desde infantil ata Bacharelato, ademais da Formación Profesional e ensinos de réxime especial -conservatorios, escolas de idiomas, escolas de artes.

Pola súa banda, a Xunta fixou, nunha orde publicada este luns no Diario Oficial de Galicia (DOG), os servizos mínimos para a folga de profesorado para este martes e este mércores, que terán que garantir a apertura e o peche dos centros escolares.

Con todo, a folga afectará o persoal docente dos centros educativos da Consellería de Educación, Ciencia, Universidades e Formación Profesional, e desenvolverase desde as 00:00 do día 16 de decembro de 2025 ata as 24:00 do día 17 de decembro de 2025.

Neste contexto, os sindicatos que convocan a folga levarán a cabo este martes marchas fúnebres en 15 localidades do territorio galego; en concreto, ademais de nas sete cidades, tamén levarán a cabo estas accións en Monforte, Moaña, Cangas, Bueu, Redondela, Gondomar, Viveiro, Ponteareas.

No caso da capital galega, este martes haberá dúas marchas fúnebres con saída ás 10:00 desde o CEIP Monte dos Postes e do IES A Pontepedriña, nas que se irán empapelando os centros que haxa neste percorrido con crespóns negros, necrolóxicas e outra simboloxía mortuoria para evidenciar a situación en que se atopa o ensino público.

Doutra banda, o mércores celebrarase unha manifestación en Santiago de Compostela que tamén terá un formato especial simulando ser a comitiva fúnebre dun enterro desde o Parlamento galego ata a Xunta, con saída ás 11:30 horas.

O obxectivo, segundo indicou a CIG, é trasladar as demandas do profesorado en canto á baixada de cocientes no primeiro curso de todas as etapas educativas; a recuperación do horario lectivo previo aos recortes; a dotación de máis profesorado para atender á diversidade, ou un plan real de eliminación da burocracia no ensino, entre outras medidas.

Ademais, lembrou que estas iniciativas coincidirán coas sesións de avaliación, polo que haberá alumnado que non levará os boletíns de notas para a casa.