Nin avances nin data para una nova reunión polo conflito laboral do transporte de viaxeiros na Coruña

A reunión fixada para este luns entre sindicatos e patronal, con mediación do Consello Galego de Relacións Laborais, polo conflito laboral no transporte de viaxeiros por estrada na provincia da Coruña acabou sen ningún tipo de aproximación de posturas e sen data para un novo encontro.

"Non hai ningún avance, quedou todo en preliminares, a patronal volve levantar da mesa alegando as mesmas desculpas que cando se levantou a outra vez, é unha portada á negociación, ao presidente da Xunta e aos usuarios e usuarias", sentenciou o representante de CIG-Transportes, Ernesto Rei.

E é que esta central, convocadora das protestas xunto a CCOO e UXT, cualifica de "irresponsable" a postura da patronal e rexeita que se poida alegar por parte da mesma "uns presuntos actos vandálicos dos que non achega proba nin feitos concretos". Entre a principal demanda dos convocadores, está a negociación dun novo convenio con melloras laborais e salariais.

Pola súa banda, o presidente da Xunta cuestionado tras o Consello sobre a situación, reiterou que é "un conflito entre a patronal do transporte e os seus traballadores". "

A Xunta ofreceu o Consello de Relacións Laborais como instrumento mediador", recalcou para insistir en que "os que teñen que poñerse de acordo son eles".

"Un conflito entre unha empresa e os seus traballadores non se pode solucionar intervindo unha Adminsitración se o que se pretende desa Adminsitración é que poña o diñeiro que lle están reclamando ás súas empresas", dixo para facer un chamamento a "cumprir a lei" en relación aos servizos mínimos fixados. "Deben ser respectados e en moitos casos non se estaban respectando", aseverou para reiterar que serán "inflexibles na esixencia do cumprimento da normativa, pero non podemos substituír o papel de ningunha das dúas partes".