Canceladas por mal tempo as liñas Ferrol-Oviedo, Ourense-Vigo Guixar e a convencional Santiago-Ourense

Os efectos da borrasca Joseph chegaron tamén ao transporte ferroviario en Galicia e, segundo informou Renfe, hai varios servizos afectados polas malas condicións meteorolóxicas.

O operador informa da cancelación do servizo entre Ourense e Santiago (rede convencional, si funcionan os Avant na liña Ourense-Santiago-A Coruña) e Ourense e Vigo Guixar, por condicións meteorolóxicas adversas.

Por condiciones meteorológicas adversas, está suspendido el servicio entre Ourense y Santiago (red convencional) y entre Ourense y Vigo-Guixar.

— INFOAdif (@InfoAdif) January 26, 2026

Funcionan con normalidade os trens de media distancia do Eixo Atlántico que chegan e saen de Vigo-Urzáiz e que fan o roteiro Urzáiz-Santiago-A Coruña.

Os servizos de media distancia con chegada ou saída desde Vigo-Guixar prestánse por estrada, coa estación de Urzáiz como punto de chegada-saída. Os servizos pola liña do Miño (Ourense-Guixar e Guixar-Ponferrada no tramo ata Ourense) suspéndense e dáse o servizo con transporte alternativo por estrada. Igualmente, faise por estrada o servizo entre Ourense-Lalín-Santiago pola liña convencional.

As condicións do tempo tamén afectan á liña de ancho métrico Ferrol-Oviedo, que igualmente está cancelada este luns. A medida afecta o servizo de proximidade Ferrol-Ortigueira e a media distancia Cudillero-Ferrol están suspendidas sen servizo alternativo.

Por condiciones meteorológicas adversas se encuentra suspendida la circulación en la línea de ancho métrico Ferrol-Oviedo/Gijón y en la de Oviedo-Santander entre Llanes y El Berrón. Para esta última hay un plan alternativo por carretera.

— INFOAdif (@InfoAdif) January 26, 2026

Asemade, o servizo transversal Galicia-Barcelona circula desviado por Santiago con saída desde Vigo-Urzáiz, en lugar da estación de Guixar; e o roteiro Vigo-O Porto faise por estrada desde Guixar ata Viana do Castelo.

Cambios e cancelacións gratuítas

Dadas as previsións meteorolóxicas, Renfe xa informara este domingo de que o servizo ferroviario en Galicia podería verse afectado este luns 26 de xaneiro ante os avisos emitidos pola Axencia Estatal de Meteoroloxía (AEMET) que afectan á comunidade autónoma.

"De acordo cos avisos emitidos por AEMET para a comunidade autónoma de Galicia, o servizo ferroviario podería verse afectado", trasladou a través dunha mensaxe na rede social X, recollido por Europa Press.

A operadora ferroviaria recomenda atender ás indicacións da AEMET e evitar os desprazamentos. Así mesmo, habilitou cambios e cancelacións gratuítas para todos os trens comerciais e de servizo público que circulen con orixe ou destino Galicia.

Alerta no interior de Pontevedra e clases suspendidas

Durante a tarde deste domingo a Dirección Xeral de Emerxencias e Interior enviou unha mensaxe de alerta, mediante o sistema de Protección Civil ES-Alert, á poboación do interior de Pontevedra polo risco de inundacións e incidencias asociadas ás choivas intensas previstas para este luns.

A mensaxe foi enviado aos teléfonos móbiles que se atopaban nos seguintes municipios: Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces. Con todo, debido á proximidade das zonas afectadas, a alerta puido chegar tamén a terminais situados en municipios limítrofes.

Durante este domingo, a Xunta xa avanzara a decisión da Comisión Escolar de Alertas de suspender as clases nos centros educativos e escolas infantís dos mesmos 16 municipios. Esta anulación atende á previsión da Axencia Estatal de Metereoloxía (AEMET), que prognostica que a precipitación acumulada en 12 horas será de 120 milímetros.