A Xunta envía unha mensaxe Es-Alert aos veciños afectados polas chuvias intensas

A Xunta enviou este domingo un Es-Alert por alerta vermella de fortes choivas este luns, no interior da provincia de Pontevedra, de maneira preventiva para garantir a seguridade da poboación, ante "o elevado risco de inundacións asociadas a precipitacións intensas".

A mensaxe foi enviada aos móbiles dos cidadáns que se atopan nos 16 municipios do interior da provincia de Pontevedra afectados pola previsión de fortes choivas, varios deles lindeiros coa provincia de Ourense.

Trátase dos concellos de Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.

O 112 precisou que a mensaxe foi enviado de maneira preventiva á poboación co obxectivo de reforzar as medidas de autoprotección e reducir os riscos, "recomendando evitar desprazamentos innecesarios, afastarse dos ríos, torrentes e zonas inundables, así como extremar a precaución tanto na vía pública como na estrada".

Desde este servizo lémbrase a importancia de manter a calma, atender á información oficial e chamar ao 112 unicamente en caso de emerxencia.

Pouco despois, o presidente da Xunta publicaba un chío na súa conta da rede social X. Alfonso Rueda explica que a alerta vermella decretada obriga a adoptar medidas extraordinarias. 

 

Mañá hai alerta vermella por fortes chuvias no interior da provincia de Pontevedra. Por iso vimos de enviar un Es-Alert aos veciños dos concellos afectados con indicacións de seguridade. Suspéndense as clases e recoméndase evitar desprazamentos innecesarios. Moita prudencia. A… https://t.co/6Tutw3fuzJ

— Alfonso Rueda (@AlfonsoRuedaGal) January 25, 2026