Clavería prepárase para dirixir o xogo do Lugo en Santander

A infancia de Pablo Clavería pasou entre dous balóns. Un grande e outro máis pequeno.

Pablo é fillo do fútbol sala. O seu pai, Jesús, era porteiro. Foi campión do mundo e de Europa coa selección selección española e gañador de sete Ligas, cinco Copas e dúas Copas de Europa co Interviu. Precisamente, esa influencia paterna marcou os seus inicios. "Empecei xogando de pequeno o fútbol sala, pero nun verán no que os meus pais traballaban, fun a un campamento do Atlético de Madrid porque era o único que coincidía así por datas. E casualidades da vida, colléronme para a escola de alí e empecei a xogar ao fútbol".

Clavería, con todo, descartou a portería e agora dirixe o xogo do Lugo como medio centro. Unha posición á que volveu o pasado domingo ante o Levante. "Volvín a unha posición na que me atopo cómodo. É verdade que nesa posición por diante da defensa tiven unha etapa en Fuenlabrada na que xoguei moito aí".

Como prolongación do técnico no terreo de xogo, o madrileño analiza a importancia do encontro ante o Racing onde se enfrontan os dous equipos con menos posesión da Segunda.

"Eu creo que é un partido moi importante tanto no anímico como a nivel clasificatorio, non? Será un partido no que o que administre mellor eses tempos con balón e menos erros cometa, estará máis preto de gañar", opina o futbolista.

Consciente da transcendencia de manter a posesión da pelota, Clavería viaxou a Santander con ela debaixo do brazo.