Claudio Giráldez: "Na segunda parte demos a nosa mellor versión"
A boa imaxe do equipo logo do descanso fai que afronte con optimismo o partido contra o Vilarreal
O técnico tamén valorou a importancia de estar entre os elixidos no sorteo da Europa League do venres
Para Claudio houbo dous tempos moi diferenciados. Un primeiro no que o Betis tivo o control e un segundo no que o Celta "foi moi superior". "Na segunda parte demos a nosa mellor versión da temporada, a miña sensación é que marcharon dous puntos, catro no que levamos de temporada" asegurou o porriñés.
O adestrador do Celta considera que ese é o camiño que ten que seguir o equipo para futuros compromisos como o do venres diante do Vilarreal, "o equipo máis en forma do campionato".
O adestrador celeste tamén valorou o que vai acontecer o vindeiro venres, día no que o Celta vai estar presente no sorteo da Europa League. "Temos que gozalo moito, é a décima vez na historia que estamos nunha competición europea". Como preferencias, Claudio elixe "desprazamentos curtos" por aquilo da recuperación para os partidos da Liga.
