Cinco detidos por roubar nunha xoiería de Vigo

A Policía Nacional detivo cinco membros dun grupo organizado criminal, de carácter itinerante, especializado en roubos con forza en establecementos, que o pasado xaneiro perpetraron un roubo con forza, facendo un buraco na parede dunha xoiería de Vigo.

Este roubo deu inicio a unha investigación por parte da Comisaría de Vigo en colaboración co grupo XXIV da Brigada Provincial de Policía Xudicial de Madrid, cidade en que o pasado novembro uno dos agora detidos participou nun roubo con forza nun establecemento comercial, onde se apoderou de efectos e diñeiro por valor total de 3.000 euros, aproximadamente.

O dispositivo policial permitiu realizar estas detencións en distintas localidades de Madrid e Toledo e a desarticulación do grupo criminal itinerante, dedicado especialmente a roubos con forza en establecementos comerciais.

Nos rexistros domiciliarios interviñéronse útiles e ferramentas susceptibles de ser utilizadas para a comisión dos feitos delituosos, ademais de varios teléfonos móbiles, e un vehículo utilizado para os desprazamentos, que se estaba desmontando en pezas para evitar que se relacione cos roubos, dificultando deste xeito a investigación.

Os detidos, asegura a Policía, caracterízanse tanto pola súa mobilidade xeográfica, como pola súa destreza no manexo de ferramentas e a utilización de técnicas específicas para a apertura de portas e caixas fortes, adoptando fortes medidas de seguridade nas súas actividades cotiás. Actualmente, a policía continúa investigando e non descarta que se poidan esclarecer novos feitos delituosos.