Catro mozos feridos nun accidente con tres vehículos implicados en Ribeira
Os catro homes teñen entre 18 e 20 anos e foron trasladados ao Hospital da Barbanza
Arquivo TVG
Catro homes novos quedaron feridos e tiveron que ser trasladados a un centro sanitario tras rexistrarse un accidente na estrada AC-550, á altura do municipio coruñés de Ribeira, segundo informou o CIAE 112 Galicia.
O sinistro tivo lugar sobre as 07:30 deste xoves, cando varios particulares contactaron con Emerxencias para informar de que se producira unha colisión con varios coches implicados e que podería haber persoas feridas. Ademais, as testemuñas alertaban da presenza de restos na calzada e de vehículos obstaculizando a circulación.
O accidente ocorreu no quilómetro 107 da AC-550, e o 112 informou a Urxencias Sanitarias de Galicia-061, aos bombeiros de Ribeira, ao Grupo de Apoio e Emerxencias Municipal de Ribeira, á Garda Civil e á Policía Local.
Unha vez no punto, os equipos de Emerxencias confirmaron que había tres vehículos implicados no accidente e que catro persoas foran trasladadas ao hospital de referencia para recibir atención médica.
Así, ao momento acudiron dúas ambulancias asistenciais de soporte vital básico do 061, e foron atendidos e trasladados ao Hospital do Barbanza catro homes: I. Q., de 18 anos; A. H., de 19 anos; M. A., de 20 anos, e A. L., de 20 anos.
