Catro mortos en Zaragoza tras chocar un coche contra un camión

Catro persoas faleceron e outra resultou ferida grave nun accidente de tráfico rexistrado este luns na N-122, entre as localidades zaragozanas de Bulbuente e Maleján, tras o choque frontal entre un turismo e un camión.

As catro persoas que faleceron eran todos ocupantes do mesmo turismo, o que impactou contra o camión, segundo informaron fontes da Deputación Provincial de Zaragoza. O ferido grave foi trasladado en helicóptero ata un centro hospitalario. No sinistro viuse implicado outro turismo, pero sen feridos.

Ata o lugar do suceso desprazáronse bombeiros da Deputación de Zaragoza, que tiveron que liberar as vítimas, e tamén interviñeron a Garda Civil e o 061.