Catro detidos por facérense pasar 56 veces por comerciais dunha compañía telefónica

 A Policía Nacional e a Garda Civil detiveron catro persoas e desarticularon un grupo criminal dedicado a estafas mediante a técnica do slamming, contratación fraudulenta de servizos de telefonía móbil, na Coruña, que repetiron polo menos 56 veces.

Segundo informou este xoves a policía, a investigación permitiu esclarecer 56 feitos delituosos cometidos en distintos puntos da provincia da Coruña.

As catro persoas foron detidas por pertencer a grupo criminal, estafa e branqueo de diñeiro.

A investigación permitiu descubrir un armazón delituoso que empregaba a técnica do slamming, que consiste na contratación fraudulenta de terminais de telefonía móbil. Para iso, os autores contactaban coas vítimas facéndose pasar por comerciais dunha compañía telefónica, e ofrecíanlles supostas melloras no seu contrato ou a entrega de teléfonos móbiles de alta gama.

Unha vez formalizada a contratación fraudulenta, un suposto mensaxeiro acudía ao domicilio da vítima alegando un erro na entrega e recollía o terminal, que posteriormente era remitido fóra do territorio nacional. Como consecuencia, as vítimas perdían o teléfono e ademais contraían unha débeda coa compañía telefónica.

A operación, desenvolvida de xeito conxunto entre Policía Nacional e Guardia Civil, culminou coa práctica de tres rexistros domiciliarios e a detención de catro persoas e o esclarecemento de 56 feitos delituosos cometidos no ámbito territorial da provincia da Coruña.

A Policía Nacional lembra que para evitar este tipo de estafas é moi importante desconfiar de chamadas de supostos comerciais de compañías de telefonía que ofrecen rebaixas desproporcionadas nos seus contratos alén da entrega gratuíta de terminais de telefonía móbil de gama alta.