Catro detidos por oito roubos en naves industriais do Deza

A Garda Civil detivo catro persoas, todos eles homes de entre 20 e 39 anos -tres de Xaén e un local-, por oito roubos en naves industriais da comarca pontevedresa do Deza, dos que dous ingresaron en prisión provisional e outros dous están en liberdade con medidas cautelares.

Aos arrestados, que teñen múltiples antecedentes penais por feitos similares, investígaselles por oito delitos de roubo.

Tres individuos chegados desde Xaén, con vínculos familiares con outro residente no Deza, son os integrantes desta banda criminal, da que sospeitaron os investigadores polo modo que empregaban para entrar nas naves industriais e as súas edificacións anexas.

En todos os seus asaltos buscaban cable de cobre, aceiro, aluminio, baterías e mesmo obxectos de pouco valor, para o que utilizaban a forza física ou medios rudimentarios para romper paredes, portas ou xanelas e poder entrar ás naves.

Tras acceder ao seu interior, almacenaban os efectos nun lugar exterior próximo para despois recollelos, de modo que se eran sorprendidos polas forzas e corpos de seguridade alegaban que era chatarra que se atoparon.

Dous deles foron sorprendidos na allada cometendo un dos roubos e, por mor deste arresto, a Garda Civil logrou identificar e deter aos outros dous compoñentes do grupo.

O valor dos efectos subtraídos, en especial o cable de cobre, así como os danos producidos nas naves exceden os 800.000 euros.

As dilixencias instruídas foron entregadas no Xulgado de Instrución 1 de Lalín, xunto cos detidos, que decretou o ingreso en prisión provisional para dous e a liberdade con medidas cautelares para os outros dous.