Unha xuíza prohibe a Trump arrestar migrantes polo seu perfil racial en California
Ordenou deter as redadas migratorias indiscriminadas nas que se arrestan persoas pola cor da pel ou o idioma que falan
Tamén emitiu unha orde que prohibe restrinxir o acceso dos avogados a un centro de detención de migrantes nos Ánxeles
Un oficial federal de migración nun tribunal dos EUA. REUTERS/David 'Dee' Delgado
A xuíza Maame Frimpong ordenoulle este venres á Administración de Donald Trump deter no sur de California as "redadas migratorias indiscriminadas" nas que se arrestan persoas polo seu perfil racial, como a cor de pel ou o idioma que falan.
A maxistrada tamén emitiu unha orde que lle prohibe ao Goberno federal restrinxir o acceso dos avogados a un centro de detención de migrantes nos Ángeles.
A decisión chega tras a demanda presentada a semana pasada, ante un tribunal de distrito de California, por persoas afectadas polas redadas e por organizacións defensoras dos dereitos humanos que denuncian múltiples violacións constitucionais e de perfil racial.
O Departamento de Seguridade Nacional (DHS) nega estas acusacións e asegura que son "repugnantes e categoricamente falsas".
A Unión Estadounidense de Liberdades Civís do Sur de California (ACLU SoCal), un dos grupos que representan as persoas demandantes, detallou nun comunicado que a orde da xuíza "prohibe aos axentes de inmigración deter persoas sen unha sospeita razoable".
Tamén impide que as detencións se baseen en factores como a raza ou etnia, falar español ou inglés con acento, o tipo de emprego ou a presenza en determinados lugares como estacións de autobús, lavadoiros de autos ou explotacións agrícolas.
A segunda orde esíxelle ao DHS "que proporcione acceso a un avogado entre semana, fins de semana e días festivos ás persoas detidas no B-18, o edificio federal no centro dos Ánxeles".
Símbolo de resistencia
As redadas migratorias na área metropolitana da cidade comezaron hai un mes e xeraron un forte rexeitamento social e mesmo enfrontamentos cos axentes, o que converteu California nun símbolo de resistencia contra o Goberno de Trump.
A demanda foi motivada despois de que o 22 de xuño uns homes enmascarados que apenas portaban un chaleco con escudos da Patrulla Fronteiriza detiveran varios traballadores de xeito violento, como quedou rexistrado en vídeos que se volveron virais.
Un dos donos do lugar, identificado como Enmanuel, denunciou que os supostos axentes ingresaron pola forza a partes restrinxidas ao público como os túneles onde está a maquinaria e confirmou que nos arrestos usaron unha forza excesiva.
Os múltiples testemuños dos familiares dos detidos coincidían en que eles estaban incomunicados e que os arrestos estaban baseados nun perfil racial.
"Sen importar a cor da súa pel, o idioma que falen ou onde traballen, todos teñen garantidos os dereitos constitucionais que os protexen de detencións ilegais”, declarou Mohammad Tajsar, avogado principal da Fundación ACLU SoCal, tras coñecerse a decisión da xuíza.
