Catro detidos na Estrada por vender cocaína e cánnabis a mozos
Un deles entrou en prisión e os outros tres quedaron en liberdade con cargos
A investigación comezou o pasado mes de abril por denuncias cidadás nas que se alertaba da venda de drogas desde un inmoble do centro urbano
Catro persoas foron detidas pola Garda Civil na Estrada, acusadas dun delito contra a saúde pública, por vender cocaína e cánnabis a mozos da localidade.
Un dos arrestados ingresou en prisión tras declarar perante o Xulgado de Instrución número 1 da Estrada, mentres que os outros tres quedaron en liberdade con cargos.
A investigación da Garda Civil comezou o pasado mes de abril por mor dunha serie de denuncias cidadás nas que se alertaba da venda de drogas que se estaba realizando desde un inmoble do centro urbano.
Os axentes, tras activar varios dispositivos de vixilancia, comprobaron que o lugar era frecuentado de maneira continua por numerosos mozos, moitos deles coñecidos drogodependentes, que acudían a adquirir as súas doses.
No rexistro do domicilio, a Garda Civil incautouse de 2,53 gramos de cocaína en cinco envoltorios plásticos, 102,5 gramos de cánnabis ocultos nunha caixa de plástico, cadernos cos rexistros de venda, dúas básculas de precisión e 720 euros en efectivo.
Ademais, durante os dispositivos de vixilancia, os axentes formularon oito denuncias por tenencia ilícita de drogas na vía pública, intervindo nove envoltorios plásticos con 0,5 gramos de cocaína cada un e dous máis con 4,18 gramos de cánnabis.
