Catro asaltos na mesma noite en igrexas da comarca do Deza

A vaga de asaltos ás igrexas do Deza non deixa máis que danos nas portas e desorde.

Luís Galego leva máis de 40 anos á fronte da igrexa de Santiago de Taboada, ao pé do Camiño de Santiago, e xa sufriu varios roubos. Desta volta, o balance do que levaron é mesmo ridículo, segundo explica, 3,65 euros.

Para levar ese botín puxeron patas arriba a sancristía e, o que é peor, forzaron a porta de entrada, que custou reparar máis de 100 euros. Na igrexa de Ponte, outro botín exiguo e máis danos no edificio. "Fixeron máis dano na porta porque usaron unha pata de cabra", di o cura, que engade que tamén levaron unha cadea, bañada en ouro, que tiña unha imaxe da virxe colgada. Ademais, unha cantidade duns 13 euros.

E algo similar tamén fixeron na igrexa de San Pedro de Losón, en Vila de Cruces, e na lalinense de Prado. Actos vandálicos que ninguén se explica e que non benefician a ninguén. Todos os asaltos foron xa denunciados.