Case o 80 % dos españois cren que os impostos non se cobran de maneira xusta
O CIS publicou a XLII enquisa sobre opinión pública e política fiscal
A gran maioría pensa que o feito de que os que máis teñen sexan os que menos pagan é demasiado inxusto
Europa Press
Case a metade dos españois cre que en España se pagan demasiados impostos. Na fronte oposta, só un 6,9 % considera que son poucos os que se aboan, e unha ampla maioría do 78,9 % defende que non son xustos, pois os que máis teñen non son os que máis pagan.
O CIS publicou este martes a XLII Enquisa sobre opinión pública e política fiscal, feita con 4.004 entrevistas.
Segundo a enquisa, os españois son pesimistas sobre o destino dos impostos. O 50,1 % pensa que a sociedade se beneficia pouco deles ou nada, mentres que un 62 % percibe menos do que paga.
Aínda así, un 18,1 % dos entrevistados están dispostos a aboar máis a cambio de mellorar os servizos públicos e só un 6,6 % avoga por baixalos aínda que afecte aos servizos.
Os españois ven servizos coma a vivenda, a investigación, a sanidade ou outros como especialmente infrafinanciados. As que máis recursos reciben son defensa, protección ao desemprego e obras públicas.
Sobre a actitude ante os impostos, máis da metade asegura que os españois son pouco ou nada conscientes e responsables, pero vense a si mesmos coma bastante ou moi conscientes e responsables.
Nove de cada dez entrevistados denuncia que existe moita fraude fiscal no país. Só o 46,2 % está convencido de que os contribuíntes declaran todos os seus ingresos na declaración da renda.
Os motivos que levan a fraude son os baixos salarios e a inxustiza de que quen máis ten é quen menos paga, segundo a enquisa.
Os enquisados rexeitan esta fraude, pois o 79,5 % considera que enganar a Facenda é enganar ao resto dos cidadáns. Nesta liña, máis da metade cre que se loita pouco contra a fraude fiscal.
Os comportamentos que menos se toleran son recibir unha prestación social sen ter dereito a ela, que unha grande empresa eluda o pago de impostos e que aos autónomos se lles deduzan gastos persoais coma se fosen de empresa.
O 54,4 % dos enquisados defende que os impostos son necesarios para o Estado, que presta servizos públicos, fronte a un 30,6 % que os considera un pago obrigatorio sen saber ben a cambio de que.
Finalmente só un 13,1 % ve os impostos coma unha forma de redistribuír mellor a riqueza, pero a maioría pensa que non se pagan de maneira xusta.
