Case 200 camións con axuda entran en Gaza ao moderarse o bloqueo sobre a Franxa

Un total de 198 camións entraron na Franxa de Gaza a través do cruzamento fronteirizo de Kerem Shalom, segundo confirmou este xoves a EFE un portavoz da Oficina para a Coordinación de Asuntos Humanitaria de Nacións Unidas en Xenebra.

Deses camións, 90 xa foron recollidos por distintas organizacións e asociacións humanitarias para que o seu contido, que inclúe produtos nutricionais, medicinas e fariña, poida ser distribuído, indicou o portavoz Jens Laerke, quen confirmou así o anunciado esta noite por Stéphane Dujarric, portavoz do secretario xeral da ONU.

"Persisten importantes dificultades para cargar e distribuír mercadorías debido á inseguridade, o risco de saqueos, os atrasos nas aprobacións de coordinación e as rutas inapropiadas proporcionadas polas forzas israelís, que non son viables para o movemento de carga", subliñou Laerke.

Israel bloqueara a entrada de axuda humanitaria a Gaza desde o 2 de marzo, antes mesmo da ruptura do último cesamento do fogo, o que unido á actual ofensiva militar na Franxa estaba a agravar a niveis máximos a catástrofe humanitaria do asediado territorio.

Segundo advertiu a semana pasada a Organización Mundial da Saúde (OMS) medio millón de gazatís atopábanse ao bordo da fame negra polo "bloqueo deliberado" de Israel e 57 nenos xa faleceran por desnutrición desde comezos de marzo.

Antes do inicio desta última guerra uns cincocentos camións con axuda humanitaria entraban a diario na Franxa. Xa en 2024 esa cifra reduciuse a uns cen cada día. O acordo para o cesamento do fogo do pasado xaneiro, que implicaba a liberación de reféns por parte de Hamas, debía traducirse en que a diario ingresarían neste territorio palestino 600 camións, incluíndo uns 50 transportarían combustible.