Netanyahu recoñece que permitiu financiar a Hamas desde Qatar para dividir a causa palestina
Qatar enviou uns 30 millóns de dólares mensuais ao brazo armado de Hamas co beneplácito de Netanyahu, quen en 2023 sinalou que esta acusación era ridícula
O primeiro ministro de Israel Benjamin Netanyahu / Ronen Zvulun / Reuters
O primeiro ministro de Israel Benjamin Netanyahu asegurou que o seu Goberno permitiu que se transferisen fondos desde Qatar a Hamas en Gaza para manter os islamistas e a Autoridade Nacional Palestina (que administra Cisxordania) divididas.
"A política que conduciu a permitir a Qatar transferir diñeiro a Gaza foi aceptada por unanimidade polo gabinete de seguridade. Por que se fixo? Porque queriamos manter divididos a Hamas e a ANP", engadiu.
Unha investigación do servizo interior de intelixencia israelí (Shin Bet) destapou que Qatar enviou uns 30 millóns de dólares mensuais a Gaza, que acababan en mans do brazo armado de Hamas, co beneplácito dos gobernos de Netanyahu.
O primeiro ministro israelí chegou a dicir en novembro de 2023 que as acusacións de que estaba a permitir o financiamento dos islamistas eran ridículas.
