Cambian as tornas, por María Bastida

Levamos meses co petróleo instalado no peor dos mundos posibles: tensión xeopolítica, Ormuz bloqueado, inventarios baixo presión, prezos disparados e bancos centrais mirando de esguello o risco dunha nova vaga inflacionista. Outra vez o cru. Outra vez Oriente Medio. E outra vez a economía pendente dunha ruta marítima.

E, de súpeto, cambian as tornas.

Abonda un avance diplomático, unha expectativa de acordo e a posibilidade de que o estreito de Ormuz volva abrirse para que o mercado cambie de humor. O petróleo cae, as previsións revísanse e o escenario empeza a parecer menos asfixiante. Non porque todo estea resolto, senón porque as expectativas deron a volta.

Os últimos acontecementos perfilan un novo horizonte. Da ameaza de estrangulamento enerxético á posibilidade dunha auténtica enxurrada de cru. Dun mercado que descontaba tensión a outro que empeza a descontar alivio. Da inflación enerxética como ameaza inmediata á esperanza de que os prezos do petróleo axuden, polo menos durante un tempo, a relaxar custos.

Todo ben, sempre que non confundamos optimismo con inxenuidade. Ormuz non se reabre cun interruptor. Hai que despexar riscos, recuperar confianza, normalizar rutas, recompoñer cadeas loxísticas e comprobar que o acordo político se mantén. O mercado financeiro adiántase; a economía real sempre vai un pouco máis amodo. Pero o cambio de escenario está aí.

Podemos pensar en tres momentos. O primeiro é o actual, un espazo de alivio, caída de prezos e unha sensación xeral de que o peor puido quedar atrás. O segundo será o da transición. Serán semanas ou meses de reapertura gradual, con posibles sobresaltos, tensións loxísticas e dúbidas sobre o cumprimento do acordo. E o terceiro, se todo encaixa, pode chegar en 2027: un mercado con máis petróleo do que precisa, inventarios reconstruíndose e prezos bastante menos tensionados.

O petróleo seguirá sendo volátil, xeopolítico e incómodo. Iso non cambiou. Pero, por un momento, o mercado mira o horizonte con algo parecido ao optimismo. E cando cambian as expectativas, cambia case todo. Desta vez, para ben.