Bustelo de Fisteus, en Quiroga, recupera poboación como aldea modelo
Subvencións da AGADER que cobren a metade dos custos facilitan a rehabilitación de vivendas e a implantación de negocios
Ás portas da serra do Courel encóntrase Bustelo de Fisteus, en Quiroga, que é unha das 21 aldeas modelo existentes actualmente en toda Galicia.
Con axudas da AGADER que cobren arredor da metade dos custos, a dona dunha imprenta puido retornar ao lugar onde nacera e trasladar tamén o seu negocio dende a área metropolitana de Vigo.
"Fóronme animando con que ían sacar liñas de axuda para empresa que se instalaran nas aldeas modelo e con que era unha boa oportunidade. Solicitei a axuda, concedéronma, iniciei as obras e o ano pasado trasladeime aquí dende a Ramallosa, en Nigrán", conta Aida Marcos, dona dunha imprenta e veciña de Bustelo.
Outras persoas seguen agora os pasos desta pioneira e decidiron asentarse tamén en Bustelo. Entre eles, tanto emigrados como foráneos, que xa están a arranxar as casas que herdaron ou adquiriron.
"Porque vin que a veciña se animou a restaurar parte das súas propiedades. Pouco a pouco, a ver se é posible que a aldea rexurda", sinala Emilio Rodríguez, dono dunha vivenda no núcleo quirogués.
Aproveitando os soutos que rodean o lugar, outro negocio que se implantou neste núcleo é unha explotación de porco celta. Prevese que a Bustelo e ao resto das aldeas modelo activas, se sumen outras sete xa en fase de recollida de firmas.
