Buscan un home de 73 anos con principio de alzhéimer desaparecido en Sada
O home vestía un pantalón vaqueiro e camisa a raias cando se lle perdeu a pista sobre as 14:30 horas do venres
A Garda Civil confirmou este sábado o inicio dun operativo de procura dun home de 73 anos con principio de alzhéimer, desaparecido desde as dúas e media da tarde deste venres en Sada.
Chámase Celso Pérez Regueiro e perdéronlle a pista na zona do Tarabelo. Levaba teléfono móbil e cartos en efectivo. O home vestía pantalón vaqueiro e camisa a raias.
No dispositivo de busca participan patrullas de Sada, Oleiros e Cambre, persoal do Servizo de Protección da Natureza (Seprona) e da unidade cinolóxica. Tamén efectivos aéreos, a Policía Local, o servizo de emerxencias, o concello, familiares e voluntariado.
As tarefas estendéronse á zona de Carnoedo e do pazo de Meirás, tras un aviso de que alguén puido velo nesa contorna dúas horas despois da súa desaparición.
