Buscan os dous homes que roubaron armados cunha pistola unha gasolineira en Verín

As forzas de seguridade buscan dous homes novos como presuntos autores dun atraco na gasolineira de Feces de Abaixo, en Verín. Aconteceu na madrugada do martes para o mércores, contra as doce e media da noite.

Ameazaron cunha pistola o empregado e marcharon cos cartos que levaba nunha carteira, entre 300 e 400 euros. Mesmo chegaron a detonar a arma, que era de simulación. Fuxiron a pé.

Sospéitase que cruzaron a fronteira. Trátase dunha estación de servizo moi concorrida precisamente por estar na raia.