A Garda Civil non descarta máis detidos polo roubo de viño de alto valor a Pepe Vieira
De momento hai dous arrestados, ambos extraballadores do restaurante con 2 estrelas Michelín, e que, segundo os investigadores, serían os autores materiais do roubo, e outros dous investigados por recibir o viño roubado
Un dos investigados, considerado o líder da organización, está en prisión por un delito de tráfico de drogas
Os catro formarían parte dun grupo criminal que se dedicaba a roubos selectivos de alto nivel en restaurantes de luxo
TVG
Na operación xa hai dous detidos, ambos extraballadores do establecemento e que, segundo os investigadores, serían os autores materiais do roubo, e outros dous investigados, neste caso por recibir o viño roubado.
Estas catro persoas, segundo a Garda Civil, formarían parte dunha organización criminal que se dedicaba a roubos selectivos de alto nivel en restaurantes de luxo.
O líder desta organización sería un home que, actualmente, cumpre prisión por delitos de tráfico de drogas e que operaba xunto a un outro da súa máxima confianza.
Os investigadores sosteñen que o grupo operaba en dous niveis claramente diferenciados, por unha banda os autores materiais que executaron o roubo utilizando unha chave falsa e, por outro, os receptores finais de alto poder adquisitivo.
Roubaron 9.000 euros en efectivo e máis de sesenta botellas de viño de alto valor
Os dous extraballadores, de 24 e 19 anos, executaron o roubo "con alta profesionalidade", indica o instituto armado, tras acceder ao local mediante o método de chave falsa e cun coñecemento preciso das claves da alarma e das caixas fortes.
Entraron no restaurante de madrugada e apoderáronse de 9.000 euros en efectivo e de máis de sesenta botellas de viño de alto valor, moitas delas de venda exclusiva en restaurantes selectos como este, que ten dúas estrelas Michelin.
Os indicios obtidos polos axentes leváronlles directamente ata o líder da banda.
O viño é único e non se atopa no mercado tradicional
En propiedades vinculadas a el e o seu máximo colaborador, a Garda Civil interveu unha importante cantidade de botellas de viño, entre elas a práctica totalidade das roubadas no restaurante de Pepe Vieira.
As botellas subtraídas, moitas delas exclusivas, teñen un elevado valor económico, son únicas e pouco factibles de atopar no mercado tradicional.
A todos os implicados investígaselles por pertenza a organización criminal, aos que se suman os cargos de roubo con forza, para os autores materiais, e de receptación, aos que tiñan o viño roubado no seu poder.
