Buscan un home de máis de 80 anos desaparecido en Ortigueira
Vírono por última vez a primeira hora da tarde deste venres
A unidade de drons da Axencia Galega de Emerxencias incorporouse ao dispositivo de busca
A unidade de drons da Axencia Galega de Emerxencias (AXEGA) colabora desde esta mañá no operativo de busca dun home de máis de 80 anos desaparecido no concello de Ortigueira.
O 112 Galicia tivo constancia da desaparición arredor das 16:00 horas da tarde deste venres, momento no que a Garda Civil solicitou a incorporación de máis medios para reforzar as tarefas de procura.
O dispositivo de busca céntrase no lugar de Rande, en Couzadoiro, e conta coa participación da Policía Local, o GES de Ortigueira e efectivos de Protección Civil.
Deste xeito, unha dotación do Grupo de Apoio Loxístico da AXEGA, especializada no manexo de drons, intégrase desde primeira hora deste sábado no operativo, para apoiar así os equipos despregados no terreo.
