Publicador de contidos

Publicador de contidos

Bruxelas propón que os países da UE recorten un 15 % o consumo de gas de forma voluntaria

Bruxelas propón que os países da UE recorten un 15 % o consumo de gas de forma voluntaria

Unha redución que Bruxelas quere poder impoñer de forma obrigatoria en caso de alerta da seguridade de subministración

A proposta de Bruxelas establece un obxectivo de redución do consumo de gas do 15 % en todos os países da UE desde o 1 de agosto do presente exercicio ata o 31 de marzo do próximo ano

G24.gal 20/07/2022 12:39 Última actualización 20/07/2022 15:02

A Comisión Europea propuxo este mércores que os países da UE recorten un 15 % o consumo de gas de forma voluntaria ata a próxima primavera, unha redución que Bruxelas quere poder impoñer de forma obrigatoria en caso de alerta da seguridade de subministración, como parte do plan Europeo de Redución de Demanda de Gas.

O Executivo comunitario expuxo unha nova regulación pola que a Comisión Europea podería declarar a alerta da seguridade da subministración de gas e impoñer reducións obrigatorias de redución do consumo de gas, previa consulta cos Estados membro.

Esta alerta declararíase no caso de que exista un risco de escaseza de gas ou unha demanda excepcionalmente alta. A proposta de Bruxelas establece un obxectivo de redución do consumo de gas do 15 % en todos os países da UE desde o 1 de agosto do presente exercicio ata o 31 de marzo do próximo ano e implicará que administracións públicas, fogares, propietarios de edificios públicos, provedores de enerxía e a industria deberán tomar medidas para aforrar gas.

Ademais, os Estados membros deberán actualizar os seus plans de emerxencia antes de finais de setembro, con medidas para cumprir o obxectivo do 15 % de redución de consumo de gas, un fito do que deberán informar o Executivo comunitario cada dous meses.

Ademais, aqueles países da UE que soliciten a subministración de gas solidario deberán demostrar que tomaron as medidas necesarias para reducir a demanda no seu mercado interno. Como parte do plan Europeo de Redución de Demanda de Gas, o Executivo comunitario expuxo criterios para proceder á redución coordinada da demanda de gas que pasa por substituílo por outros combustibles fósiles e por medidas de aforro enerxético en todos os sectores.

A proposta do Executivo comunitario formula asegurar a subministración aos fogares, aos hospitais e a outras industrias críticas para o funcionamento da economía e para a competitividade da UE, polo que insta a substituír o consumo de gas por outros combustibles e a aforrar enerxía de tal maneira que a UE dispoña de máis reservas de gas cara ao próximo inverno.

O Goberno defende que as medidas de aforro enerxético non deben ser iguais para todos os países europeos

Hai preocupación nas empresas españolas sobre a obriga de parar a produción se escasea a enerxía. A vicepresidenta terceira do Goberno, Teresa Ribera, nega que vaia haber racionamento e a vicepresidenta primeira. Nadia Calviño, cre que non todos os países teñen que ter as mesmas restricións porque, di, no caso de España, hai menor dependencia do gas ruso.

 A dependencia de Rusia é desigual, e por iso tamén sería desigual o impacto dun corte total na subministración do gas ruso. A vicepresidenta Nadia Calviño di que España está en moi boa posición, tanto que pode ser para Europa unha garantía enerxética se Putin decide cortar.

Sería inevitable unha alza de prezos, para todos, pero o Goberno cre que as restricións non poden ser as mesmas. É o que defenderá ante Europa porque entende que España está nunha situación máis favorable. 

Publicidade
Publicidade
Publicidade
Publicidade