A Unión Europea endurece as medidas de sancións contra Rusia

A Unión Europea aprobou este xoves o décimo noveno paquete de sancións contra Rusia pola guerra en Ucraína, que avanza a 2027, un ano antes do previsto, o veto ao transporte do gas natural licuado (GNL) e sanciona a frota pantasma rusa. As novas sancións, que a UE aprobou por unanimidade xusto antes de que os líderes europeos celebren un novo cumio en Bruxelas, prevén un veto progresivo ás importacións de GNL, a partir de abril para os contratos de curto prazo e a partir do 1 de xaneiro de 2027 para os de longo prazo, informaron fontes diplomáticas.

Os países da UE incluíron 117 novos barcos da frota rusa na sombra á súa lista de medidas restritivas, co que en total son xa 558 os buques sancionados. A UE tamén decidiu restrinxir os movementos dos diplomáticos rusos entre os países do bloque comunitario e castigou 45 novas empresas que axudan a Rusia a eludir as sancións, entre as que se atopan doce da China, tres da India e dúas de Tailandia.

"Hoxe é un gran día para Europa e Ucraína, é extremadamente positivo que alcanzásemos un acordo no décimo noveno paquete de sancións contra Rusia", dixo o ministro de Exteriores danés Lars Lokke Rasmusen, cuxo país ocupa este semestre a presidencia rotatoria da UE. Así mesmo, os Vinte e sete ampliaron os criterios para sancionar os responsables do secuestro de nenos ucraínos e levalos a Rusia.

As medidas restritivas céntranse tamén no sector financeiro ruso, xa que a UE impediu as transaccións a cinco novos bancos e estendeu as sancións contra o sistema ruso de pagos electrónicos e tamén se prohibiron por completo as transaccións de criptomoedas. A UE ampliou ademais as súas sancións contra os bens industriais de dobre uso que Rusia utiliza no campo de batalla.

As sancións aprobáronse despois de que Eslovaquia dese o seu visto e prace ao décimo noveno paquete, que antes apoiaran tamén Hungría e Austria. As sancións da UE coinciden coas que esta noite aprobaron os Estados Unidos contra as dúas principais petroleiras rusas, Rosneft e Lukoil, como resposta á falta de compromiso serio por parte de Rusia cun proceso de paz para poñer fin á guerra en Ucraína.

Zelenski celebra a sancións da UE e os EUA a Rusia pero pide máis presión contra Putin

O presidente de Ucraína Volodimir Zelenski celebrou este xoves as novas sancións que os Estados Unidos e a Unión Europea aprobaron contra Rusia pero pediulles que sigan apertando o presidente ruso Vladimir Putin para que acepte un cesamento do fogo.

"Este paquete de sancións é crucial para nós. Moitas grazas. (É unha medida que) Chega tras a decisión que onte tomou o presidente (dos Estados Unidos, Donald) Trump, ao sector enerxético. Esperabámolos. Oxalá funcione. É moi importante", dixo Zelenski en declaracións á prensa, á súa chegada ao cumio que os líderes europeos celebran hoxe en Bruxelas.

"Rusia non demostra que quere parar esta guerra coa que nos atacan. Vemos (ataques contra) garderías, escolas, civís, o que significa que non só temos que defendernos, xunto a Europa, xunto a Estados Unidos, temos que apertar a Putin para que pare a guerra", continuou.