Bruxelas acorda levantar todas as sancións económicas a Siria

Os ministros de Exteriores da Unión Europea chegaron este martes a un acordo para suspender todas as sancións económicas que aínda aplican a Siria, co obxectivo de favorecer a recuperación da economía dese país tras a caída do réxime de Bachar al Asad.

Con todo, pactaron manter as medidas restritivas contra Asad e a súa contorna ou en relación con violacións de dereitos humanos, informou a alta representante da UE para Asuntos Exteriores e de Seguridade, Kaja Kallas, nunha conferencia de prensa ao remate do Consello de ministros de Exteriores comunitarios.

"Esta decisión é reversible e está condicionada tamén ao progreso. Non pode haber paz sen o camiño cara á recuperación económica, e todos necesitamos unha Siria estable", agregou.

A finais de febreiro, o Consello da UE xa decidira suspender as sancións que tiña impostas aos sectores do transporte e a enerxía de Siria, a fin de "apoiar unha transición política integradora" no país e unha "rápida recuperación económica, reconstrución e estabilización".

Co acordo deste martes, os ministros levantarán as sancións económicas que quedaban, relacionadas principalmente co sector financeiro, segundo fontes diplomáticas.

A presidenta da Comisión Europea, Ursula von der Leyen, dixo a través de redes sociais acoller con satisfacción a decisión de levantar estas restricións a Siria.

“O camiño cara á recuperación aínda é longo, pero Europa está disposta a colaborar con Siria ao longo do mesmo”, indicou. Deixou claro que queren “ser socios no crecemento de Siria, xunto aos nosos aliados na rexión e fóra de ela”. “A reconciliación é o primeiro paso crucial cara á reconstrución”, concluíu.

Pola súa banda, o presidente do Consello Europeo tamén celebrou a decisión.

"O acordo demostra que a UE segue á beira do pobo sirio, como fixemos no pasado e faremos no futuro”, asegurou António Costa.

Lembrou que xa lle transmitiu en marzo ao presidente interino de Siria que “a UE se compromete a apoiar unha transición pacífica e integradora, dirixida e controlada polos sirios, para axudar a construír un futuro mellor para todos os sirios”.