Bota a andar en Lugo un novo colectivo veciñal centrado no sur da cidade
A asociación veciñal As Carballeiras nace para canalizar as demandas dos residentes en barrios como Fingoi ou Augas Férreas
Os barrios do sur de Lugo, como Fingoi ou Augas Férreas, contan cun novo colectivo para canalizar as demandas dos residentes ou programar actividades abertas a toda a cidadanía. Segundo os seus impulsores, a asociación veciñal As Carballeiras busca encher un baleiro que ata o momento non fora cuberto.
"Fomentar as relacións entre a veciñanza, a cooperación, a participación activa na cidade e servir de canle de reivindicacións en todo tipo de asuntos, dende o deportivo ata os cívicos ou sanitarios. Tamén queremos fomentar a non discriminación, fomentando a participación das persoas máis discriminadas nos barrios, sobre todo as que veñen de fóra e que as veces se senten fóra da cidade", explica Beni Abeledo, presidente da asociación veciñal As Carballeiras.
A primeira iniciativa do novo colectivo é un percorrido guiado, de balde e aberto a todo o público, dende o centro social de Fingoi ata a praza Roxa. Segundo sinalan non será, nin moito menos, a última proposta que fagan, algo que a veciñanza da zona ve con bos ollos.
"Temos previstas varias actividades ao longo do ano, espaciadas no tempo. Imos facer roteiros, algunha actividade deportiva, cultural e incluso de información, como unha charla médica que cremos importante para a veciñanza maior. Como primeira actividade, comezaremos este sábado cun roteiro por Fingoi", sinala o representante veciñal.
O colectivo asegura que anunciará as actividades polas redes sociais segundo se vaian programando, e convida a cidadanía a participar con propostas de xeito activo.
