Bombeiros forestais vascos fórmanse en Galicia grazas ao programa de intercambio
O obxectivo da iniciativa é reforzar a cooperación entre ambas as dúas institucións en materia de loita contra o lume
Os técnicos e axentes de Biscaia poderán integrarse nos labores de extinción dalgún lume que se rexistre na comunidade
Imaxe cedida pola Xunta de Galicia
Arredor dunha trintena de profesionais do Infobi (Incendios Forestais de Bizkaia) estarán ao longo deste mes de agosto e do vindeiro de setembro en Galicia, como parte da segunda edición do programa de intercambio entre a Deputación Foral da provincia vasca e a Xunta.
O obxectivo da iniciativa é reforzar a cooperación entre ambas as dúas institucións en materia de loita contra o lume. Así, os efectivos procedentes de Euskadi, terán a oportunidade de coñecer a organización e funcionamento do Servizo de Prevención de Incendios Forestais (SPIF).
O programa da estadía inclúe visitas a diferentes bases e centros de operacións, entre eles o Centro de Coordinación Central de Santiago de Compostela, no que os profesionais vascos estiveron acompañados polo director xeral de Defensa do Monte da Consellería do Medio Rural, Manuel Francisco.
Ademais, o grupo tamén coñeceu o Centro Integral de Loita contra o Lume (CILL), situado na localidade ourensá de Toén, no que recibiu explicacións polo miúdo sobre o operativo da Xunta e tamén en relación co funcionamento dunha motobomba, en especial do seu sistema de autoprotección. Así mesmo, os profesionais tiveron tamén a oportunidade de realizar o circuíto de adestramento para o persoal que se atopa nestas instalacións.
A maiores, tal e como xa se incluíu na edición anterior deste programa de cooperación, os técnicos e axentes de Biscaia poderán integrarse nos labores de extinción dalgún lume que se rexistre en Galicia, sempre baixo a coordinación operativa do dispositivo da Xunta.
A estadía en Galicia destes efectivos súmase á chegada de bombeiros forestais doutras latitudes, caso dos búlgaros que estiveron durante o mes de xullo na nosa comunidade, ou de profesionais de Estonia e os Países Baixos que tamén se achegaron en campañas anteriores, para coñecer o traballo que realiza o SPIF galego.
