Bombeiros forestais maniféstanse en demanda dun servizo 100 % público e profesional

Persoal do servizo autonómico de extinción e prevención de incendios manifestouse este luns en Santiago de Compostela pola mellora das condicións de traballo e para reclamar un servizo 100 % público e profesional. Os traballadores e traballadoras concentráronse diante do edificio administrativo da Xunta de Galicia en San Caetano, precisamente o día en que uns mil xa non formarán parte do servizo polo comezo da suspensión dos seus contratos, informou a Confederación Intersindical Galega (CIG), convocadora da manifestación.

A mobilización desta mañá foi acordada nas asembleas do persoal do Servizo de Prevención e Defensa contra Incendios Forestais (SPIF) para esixir melloras salariais e da seguridade, e por un servizo totalmente público, profesional e formado, que traballe todo o ano. Xulio Saiáns, bombeiro forestal e delegado da CIG, considera que o Goberno galego "non actúa con responsabilidade", ao entender que este persoal pode ser "parte da restauración das zonas incendiadas e facer traballos de prevención para que o ano que vén os incendios sexan con menos intensidade".

Criticou que a Consellería non dese aínda resposta ás súas reivindicacións. "Non se está facendo unha valoración responsable do que pasou este verán e nós temos moito que dicir porque estamos a pé de lume; somos parte da solución ás vagas de incendios". Saiáns explicou que "son incendios dunha gravidade bastante importante" e que "transcenden á capacidade de extinción por medios humanos".

"Nós atendemos multiemerxencias porque apagamos o lume pero tamén defendemos aldeas e espazos naturais, dixo, e engadiu que "está a entrar xente a traballar con pouca ou ningunha formación". "Cremos que isto se vai repetir por tal como está hoxe en día o rural. Estatisticamente ata o de agora as vagas de incendios repetíanse cada cinco anos e agora vemos que ocorren con menos tempo axudadas polo cambio climático", indicou.

Desde CIG-Autonómica lembran que noutras comunidades os gobernos xa melloraron as condicións de traballo do persoal de extinción de incendios, e censuran que a Consellería do Medio Rural "ignore" as necesidades do servizo e "abandone" o seu persoal, "negándose a abrir unha mesa de negociación".

Critican, ademais, que durante a vaga de incendios deste pasado verán, a Xunta, "no canto de utilizar os recursos propios tentou culpabilizar o Goberno estatal da súa incompetencia na xestión e agora está a usar como arma política a ausencia de restauración dos montes tras os incendios".

Neste sentido, CIG-Autonómica destaca a necesidade de conformar "un servizo público esencial nas multiemerxencias" do medio natural e rural, que ademais de traballar na extinción e prevención dos incendios forestais, axude nas tarefas de restauración e contención "do desastre ecolóxico e de saúde pública que se produce nas comarcas devastadas" polo lume.

"A Consellería opera noutra dirección e, tras a vaga de incendios, os orzamentos aumentan para a externalización de funcións sen que un só euro destínese a mellorar as condicións ou a seguridade do seu propio persoal", critica CIG-Autonómica.