Betanzos denuncia unha vertedura de augas fecais no río Mendo

Técnicos de Viaqua e da Policía Local de Betanzos tomaron mostras da vertedura detectada no río Mendo, preto do punto de captación de auga do que se abastece a vila. E intentaron seguir o seu rastro río arriba para dar coa orixe.

O cheiro e o aspecto da vertedura apunta a augas fecais, pero iso saberase co resultado das análises, que poden tardar dous ou tres días.

Cando teña os resultados, o Concello presentará unha denuncia no xulgado.

"Cando menos é un atentado ambiental, o que non sabemos é se pode ser tamén contra a saúde pública", apuntaba a alcaldesa en funcións María Barral.

Non se descarta que poida ter relación co gromo de gastroenterite que causou máis de 400 casos e mantén restrinxido o uso da auga da billa desde hai tres semanas na vila ao detectarse a presenza dun noravirus.