Envían dende Vilagarcía axuda humanitaria para os cidadáns de Ucraína

Fundiciones Rey, en Vilagarcía de Arousa, está desbordada pola cantidade de xente que colaborou ou xa anunciou que colaborará con esta iniciativa de axuda humanitaria. Particulares e empresas fan chegar ata Arousa toda clase de bens con destino á fronteira polaco-ucraína para que logo se distribúan por distintos puntos de Ucraína.

Xa partiu un tráiler e probablemente mañá sairá outro máis. Ademais ofrécense a acoller tamén refuxiados que cheguen do país ucraíno. Case entre bágoas e moi emocionado, un dos propietarios desta empresa, Elías Cochón, ofrece os seus camións para transportar refuxiados dende Ucraína e darlles acollida aquí.

O vínculo dos que forman parte desta compañía que ten negocios con socios ucraínos dende hai anos é moi intenso. A resposta dende que comezou o ataque ruso sobre o seu veciño foi inmediata e masiva por parte de moitos colaboradores.

A única división que fan é entre produtos alimentarios e perecedoiros ou sanitarios, que tamén é un conxunto heteroxéneo para conseguir que chegue ata Ucraína calquera cousa de primeira necesidade nunha situación de guerra como a actual.