Aviso amarelo por fortes choivas nas provincias da Coruña e Pontevedra
Rianxo e Lousame superaron os trinta litros por metro cadrado acumulados
O 112 rexistrou asolagamentos e pozas nas estradas por mor das precipitacións
Para a noitiña a neve podería facer acto de presenza en cotas superiores aos 1.100 metros
Un aviso amarelo por fortes choivas no oeste de Galicia, e por forte mar de vento no litoral coruñés e nas Rías Baixas era o que adiantaban as previsións, e estanse cumprindo.
Meteogalicia xa avisara de que nalgúns puntos poderían acadarse ata trinta litros por metro cadrado, e aínda que son cifras acumuladas nas últimas doce horas, en zonas do suroeste da provincia coruñesa como Rianxo e Lousame xa se recolleron eses trinta milímetros e preto quedaron tamén zonas da provincia como Val do Dubra ou Narón.
En vilas como Padrón, a presenza intensa das chuvieiras lévase con resignación. Na Ponte Maceira, entre os concellos de Negreira e Ames a presenza de abundantes choivas pouco variou o caudal do río Tambre pero axudou a deixar típicas estampas outonais. E en Vigo, os paraugas foron o trebello por excelencia durante a mañá.
O 112 xa rexistrou unhas quince incidencias en toda Galicia por pequenos asolagamentos nalgunhas rúas e tamén pola presenza de pozas en tramos puntuais das estradas, pero nada fóra do habitual neste tipo de episodios por meteoroloxía adversa.
Segundo Meteogalicia, a situación de alerta continuará ata media tarde, e podería nevar por riba dos 1.100 metros cara á noite. Mañá, situación de transición ata a chegada de novas choivas.
.png)
.png)
