Portugal comisa 5 toneladas de cocaína nun barco proveniente da América Latina

A Policía portuguesa informou este mércores de que desarticulou unha banda que se dedicaba a introducir droga no continente europeo e que transportaba no momento da detención preto de cinco toneladas de cocaína nun navío proveniente dun país da América Latina.

A Policía Xudicial (PX), que non precisou o país do que proviña a embarcación, explicou nun comunicado que nesta operación, realizada en colaboración coa Mariña e a Forza Aérea de Portugal, foron detidas tres persoas de nacionalidade estranxeira, dúas delas "en situación clandestina e irregular".

"O navío, proveniente dun país de América Latina, foi detectado e abordado a preto de 640 millas náuticas de Lisboa (uns 1.185 quilómetros) en condicións de dificultade extrema", explicou a PX.

Durante a inspección do barco portacontedores detiveron ás dúas persoas en situación clandestina, así como a un membro da tripulación "por haber fortes sospeitas de que estaba implicado no armazón delituoso".

No navío identificaron tamén "varios obxectos" usados para a navegación e o transporte de droga.

A PX aclarou que esta investigación, realizada no marco do MAOC-N (Maritime Analysis and Operations Centre – Drugs), iniciouse este agosto como parte dunha cooperación policial internacional e en "estreita colaboración e articulación" coas autoridades policiais e xudiciais de Reino Unido (National Crime Agency) e España (Policía Nacional).

O navío identificado, cos polisóns e a droga, foi acompañado pola Mariña lusa ata o porto de Sines (uns 160 quilómetros ao sur de Lisboa), onde atracou na madrugada de onte, martes.