Atopan un matrimonio morto no baño da súa casa en Valencia por un escape de gas
Os corpos dos falecidos, sen signos de violencia, estaban na ducha xuntos
Un matrimonio foi atopado sen vida a madrugada deste venres no interior da ducha do seu domicilio en Valencia, nun suceso que a Policía Nacional atribúe a un accidente doméstico pola mala combustión da caldeira de gas.
Segundo informaron a EFE fontes da Policía Nacional, sobre as dúas da madrugada foron alertados polo fillo do matrimonio, ambos de orixe chinesa e nados en 1956.
Ao chegar os axentes ao domicilio, situado na Avenida de Giorgeta de València, notaron un forte cheiro a gas, aínda que este xa fora pechado polo fillo dos falecidos.
O matrimonio falecido estaba no interior da ducha, xa que ambos se duchaban xuntos porque un deles tiña mobilidade reducida, segundo as fontes, que indican que non había ningún indicio de violencia e todo apunta á mala combustión da caldeira de gas instalada no baño, que xa daba problemas desde hai varios días.
