A Policía indonesia detén dous homes que confesaron planear o asasinato de Matilde Muñoz
Atopan o corpo sen vida de Matilde Muñoz, a ferrolá de 72 anos que desapareceu en Indonesia, "enterrado nunha praia de Lombok"
A Policía da illa indonesia de Lombok atopou o corpo sen vida da ferrolá Matilde Muñoz, desaparecida desde hai dous meses.
Ignacio Vilariño, sobriño da ferrolá, confirmou por mensaxe que o corpo da súa tía foi achado "enterrada nunha praia de Lombok".
"Estou á espera de máis información", dixo Ignacio Vilariño.
A Policía indonesia iniciou unha investigación pola desaparición de Muñoz en Lombok, illa próxima á turística Bali, o 13 de agosto, despois de que a Embaixada de España no país solicitase axuda por carta.
A Policía asegurou que detivo a dous homes que confesaron planear o asasinato de Matilde Muñoz. Os sospeitosos foron detidos polo "homicidio premeditado e roubo con violencia" de Muñoz.
Trátase de dous homes de 34 e 30 anos residentes da localidade de Senggigi, onde está situado o hotel de Muñoz na illa.
Un dos homes foi detido na súa residencia e outro no hospital Maratam City cando visitaba á súa familia.
"Os dous admitiron planear o asasinato da vítima. Entraron á habitación da vítima a través dunha xanela", indicou o policía no comunicado, que engade que, segundo as confesións, tiñan como obxectivo "roubar as pertenzas" de Muñoz.
A muller foi asfixiada e o seu corpo, que foi trasladado ao Hospital da Policía Rexional Bhayangkara para examinalo, foi achado na praia próxima ao seu hotel.
A primeira alerta sobre a súa desaparición deuna a súa amiga Olga Marín Calonge o 28 de xullo na comisaría de Sant Feliu de Guixols.
A ferrolá foi supostamente vista por última vez a comezos de xullo por persoal do hotel onde se aloxaba en Lombok, mentres o seu círculo íntimo asegurou non saber dela desde finais de xuño.
No hotel Bumi Aditya de Lombok, onde se aloxaba, tamén afirmaron á Policía que lles enviou unha mensaxe dicindo que estaba en Laos o día 6 de xullo, o que desmentiron as autoridades de Inmigración indonesias.
Nada en Ferrol en 1952 e afincada en Mallorca, María Matilde Muñoz Cazrola, xubilada e quen pasaba longas tempadas viaxando por Asia, chegara á illa de Lombok en xuño.
