Atopan en moi mal estado unha cría de balea na praia de Santa Cristina, en Oleiros
Biólogos do CEMMA tiveron que practicarlle a eutanasia para evitarlle sufrimento
Tomaron mostras do animal para coñecer por que se afastou da súa nai
Uns veciños atoparon este luns preto da praia de Santa Cristina, en Oleiros, a cría dunha balea alibranca de tres meses, que chegou dende mar aberto.
Estaba en moi mal estado, desnutrida e cun cravo na boca. Malia os esforzos das voluntarias por devolvela a augas profundas, a cría non puido sobrevivir. Pesaba pouco máis de 200 quilos, cando, segundo os biólogos da Coordinadora para o Estudo dos Mamíferos Mariños (CEMMA), o normal é que con tres meses chegase case aos 500.
"Era realmente unha balea e estaba en condicións moi complicadas. Valoramos que non tiña viabilidade e fixémoslle a eutanasia", asegurou Gerardo López, coordinador do Servizo Municipal de Emerxencias de Oleiros.
A cría de balea aínda mamaba e chegou á praia de Santa Cristina desnutrida.
"O animal traía un cravo na boca, que llo quitaron eles e estaban contentos nun principio e pensaron que se podía librar, pero non podía. Esta é unha situación complexa, porque non todo o mundo o entende fácilmente e a única forma de solucionalo é darlle o final máis humanitario", manifestou Alfredo Vázquez, biólogo da Coordinadora para o Estudo dos Mamíferos Mariños.
Dous biólogos do CEMMA tomaron medidas e inspeccionaron os restos da cría antes de empezar a necropsia, que permitirá saber os motivos polos que este animal de tres meses se afastou da súa nai.
"Imos recoller restos de todos os órganos para facer análises patolóxicas e ver que lle puido pasar", engade Alfredo Vázquez.
A balea alibranca é moi común nas costas galegas; non está en perigo de extinción pero é moi pouco habitual que unha cría de tres meses se afaste da súa nai e apareza case morta preto dunha praia.
